Հայաստանի բջջային կապի երեք օպերատորները II եռամսյակի վերջում 21,3 մլրդ դրամ հարկ են վճարել պետբյուջե

ԵՐԵՎԱՆ, 25 հուլիսի. /ԱՌԿԱ/. Հայաստանի հեռահաղորդակցության շուկայում գործող երեք ընկերությունները 2014թ.-ի երկրորդ եռամսյակի վերջում 21,3 մլրդ դրամ հարկ են վճարել պետբյուջե՝ 2013թ.-ի նույն ժամանակահատվածում վճարած 19,9 մլրդ դրամի դիմաց: Նման տվյալներ են ներկայացված Հայաստանի 1000 խոշոր հարկատուների ցանկում, որը հրապարակել է Հայաստանի կառավարությանն առընթեր Պետեկամուտների կոմիտեն:

Հրապարակված տվյալների համաձայն՝ օպերատորների (VivaCell-MTS, «ԱրմենՏել» և «Orange Armenia») կողմից վճարված բոլոր հարկերի կառուցվածքում հարկային մարմինների հավաքած միջոցները կազմել են ավելի քան 20 մլրդ դրամ, մաքսային մարմինների կողմից՝ 455,5 մլն  դրամ, այլ հարկերի և տուրքերի գծով վճարները կազմել են 1,28 մլրդ դրամ:

Այսպես, VivaCell-MTS-ը (Ղ-Տելեկոմ) երկրորդ եռամսյակում պետբյուջե է վճարել 10,2 մլրդ դրամ (2-րդ տեղ), «ԱրմենՏել» ընկերությունը (ապրանքանիշը՝ Beeline)՝ 8,6 մլրդ դրամ (4-րդ տեղ), իսկ Orange Armenia-ն՝ 2,4 մլրդ դրամ (18-րդ տեղը):

Հայաստանի 1000 խոշորագույն հարկատուները 2014թ.-ի երկրորդ եռամսյակի արդյունքում պետբյուջե են վճարել ավելի քան 325,9 մլրդ դրամ՝ 2013թ.-ի հունվար-հունիսին վճարած 313,7 մլրդ դրամի համեմատ: Ցանկը գլխավորում է «Գազպրոմ Արմենիան»-ն, որը առաջին կիսամյակում վճարել է 23,9 մլրդ դրամ՝ 2013թ.-ի հունվար-հունիսին վճարած մոտ 19,4 մլրդ դրամի համեմատ:

«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։

Orange Armenia–ն France Telecom (ապրանքանիշը` Orange) ընկերության 100 տոկոսանոց դուստր ընկերությունն է, որը հայկական շուկա է մտել 2009թ.–ի նոյեմբերի 5–ին։ Այն ապահովում է ցանցի 83 տոկոսանոց ծածկույթ և բջջային ցանցի և ինտերնետ հասանելիություն հանրապետության 600 համայնքներում (քաղաքներում և գյուղերում):

VivaCell-MTS (Ղ-Տելեկոմ) ընկերությունը հայկական շուկայում գործում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին: (1 դոլարը - 406,56 դրամ):-0

Ծանոթացեք լուրերին առաջինն ու քննարկեք դրանք մեր Telegram-ում

19:19 25.07.2014