Isa na namang kalihim na itinalaga ni Pangulong Rodrigo Duterte ang hindi nakalusot sa pagsala ng makapangyarihang Commission on Appointments (CA). 

Matapos na ilang ulit na malampasan, tuluyan nang ibinasura ng CA nitong Martes ang paghirang kay Paulyn Ubial bilang kalihim ng Department of Health.

Si Ubial ang ikalimang miyembro ng Gabinete ni  Duterte na hindi nakalusot sa CA.

Nauna nang ibinasura ng CA ang kompirmasyon nina Agrarian Reform  Secretary Rafael Mariano, Social Welfare Secretary Judy Taguiwalo, Environment Secretary Gina Lopez, at Foreign Affairs Secretary Perfecto Yasay, Jr.

Matapos ang sikretong botohan nitong Martes, inihayag sa plenaryo ni Senador Gregorio Honasan, tagapangulo ng CA health committee, na pagkaraan ng tatlong pagdinig ay nagdesisyon ang komite na ibasura ang kompirmasyon ni Ubial.

Sa pagdinig ng komite, naging emosyonal si Ubial nang tanungin kung gusto pa niyang gampanan ang kaniyang trabaho sakabila ng mga oposisyon na isinampa laban sa kaniya.

"I know there are a lot of opposition and manifestation that are before you about my not being capable and to be the secretary of Health, but your honor, I stand by my commitment to the President," ayon kay Ubial.

“He appointed me as Health Secretary and whatever happens today, I will serve at the pleasure of the President,” dagdag pa niya.

Nang makapanayam ng mga mamamahayag si Ubial tungkol sa pagiging emosyunal, sinabi ng kalihim na; "Talagang mababaw ang luha ko. Mahilig akong manood ng mga teledrama."

Kabilang si dating Philippine Health Insurance Corporation (PhilHealth) interim president at chief executive officer (CEO) Hildegardes Dineros sa mga dumalo sa pagdinig nitong Martes.

Inihayag ni Dineros na nagsinungaling umano si Ubial sa CA nang sabihin ng kalihim na kusa siyang nagbitiw sa kaniyang posisyon sa PhilHealth.

"She lied. I did not resign but ousted upon the instigation of Sec. Ubial... I was forcibly ousted," sabi ni Dineros.

Giit pa ni Dineros,  mahina ang "management skills" ni Ubial, at may ugali na ng pagsisinungaling, at walang direksyon sa pamamalakad sa sektor na pangkalusugan.

Itinanggi naman ni Ubial ang mga paratang ni Dineros at binasa ang "minutes" ng nasabing board meeting at boluntaryo raw na nagbitiw sa tungkulin si Dineros.

"Dineros said he is resigning as PCEO (PhilHealth CEO) just to give the Board all the allowance to choose," sabi ni Ubial.

"I asked him ‘are you sure you want to resign?'... Upon a motion duly seconded, the board accepted the resignation of Dineros," dagdag ni Ubial.

Matapos nito, nahalal si Dr. Celestina Ma Jude de la Serna bilang interim / officer-in-charge ng PCEO.

Dumalo rin sa CA committee hearing si Maria Fe Francisco, isa sa 150 empleyado na pumirma ng manifesto laban kay Ubial, para tutulan ang kumpirmasyon ng Health Secretary.

Itinanong naman ni Occidental Mindoro Rep. Josephine Sato kay Ubial tungkol sa pagkakatalaga ng mga interim / OIC PCEOs.

"Why not pass a resolution recommending these people to the President to be appointed full-fledged president to the corporation?” tanong ni Sato, kung saan sinagot ni Ubial na nirekomenda na nila ang pagtatalaga kay de la Serna noong Hunyo 9.

"You cannot abrogate it upon yourself to appoint successive OIC presidents," sinabi ni Sato kay Ubial.--Kathrina Charmaine Alvarez/Jamil Santos/FRJ, GMA News