Valenzuela mayor, 6 pa sinibak ng Ombudsman
MANILA, Philippines – Sinibak sa tungkulin ng Office of Ombudsman sina Valenzuela Mayor Rexlon “Rex” Gatchalian at 6 pang opisyal ng Valenzuela City Hall kaugnay ng sunog noong May 13, 2015 sa pabrika ng tsinelas sa nasabing lungsod na kumitil ng 72 katao.
Sa desisyong ibinaba ni Ombudsman Conchita Carpio-Morales na may petsang Pebrero 11, 2016, napatunayang nagkasala sa kasong grave misconduct at gross neglect of duty sina Gatchalian, Valenzuela Business Permit and Licensing Office (BPLO) Officer-in-Charge Renchie May Padayao, BPLO Licensing Officer IV Eduardo Carreon, Valenzuela City Fire Marshal F/Superintendent Mel Jose Lagan, Fire Safety Chief F/Senior Inspector Edgrover Oculam, Fire Safety Inspector SF02 Rolando Avendan, at Fire officer Ramon Maderazo.
Ang pito ay ipinag-utos na matanggal sa kanilang serbisyo na may accessory penalties na forfeiture of benefits at privileges at perpetual disqualification na pumasok sa gobyerno.
Napatunayan din ng Ombudsman na may probable para kasuhan sina Gatchalian, Padayao, Carreon, Lagan, Oculam, Avendan, at Kentex operations manager Terrence King Ong ng reckless imprudence resulting in multiple homicides at multiple physical injuries.
Kinasuhan din ang mga opisyales ng Bureau of Fire Protection (BFP) dahil sa paglabag sa Fire Code ng mag-isyu sa Kentex ng fire safety inspection certificate, habang ang city officials ay kinasuhan dahil sa pag-isyu ng business permit sa nasunog na pabrika noong 2014 at 2015 sa kabila ng pagkabigo nito na mag-comply sa Fire Code regulations.
Kaugnay nito, iginiit kahapon ni Mayor Gatchalian na hindi siya bababa sa kanyang puwesto dahil nakakuha na sila ng temporary restraining order (TRO) mula sa Court of Appeals.
“My counsels received an order to that effect. To the same degree, they were also able to secure a TRO, so the OMBU (Ombudsman) decision will not take effect,” ani Gatchalian sa panayam. Hindi naman nito nilinaw kung hanggang kailan tatagal ang TRO na nakuha sa Court of Appeals.
- Latest
