Twitter–ը 2–րդ եռամսյակն ավարտել է 144.6 մլն դոլարի վնասով, հասույթը մեծացել է ավելի քան երկու անգամ` մինչև 312 մլն դոլար
ԵՐԵՎԱՆ, 30 հուլիսի. /ԱՌԿԱ/. Twitter Inc.–ը հայտնել է երկրորդ եռամսյակում հասույթի` ավելի քան կրկնակի ավելացման մասին։ Ընկերությունը հասել է օգտագործողների թվի աճի բարելավման և հասկացրել է, որ հաղորդագրությունների ծառայության գրավչությունը բարձրացնելու իր ձգտումը լայն լսարանի աչքում պտուղ է բերում, հաղորդում է РБК–ն` հղում անելով Dow Jones–ին։
Կանոնավոր առուվաճառքի ավարտից հետո Twitter–ի բաժնետոմսերն աճել են 30 տոկոսով` ֆինանսական արդյունքներն էապես գերազանցել են վերլուծաբանների ակնկալիքները։ Բացի այդ, Twitter–ն ընթացիկ եռամսյակի և տարվա ուժեղ կանխատեսում է հրապարակել։
Twitter–ի հասույթն աճել է մինչև 312.2 մլն դոլար նախորդ տարվա 139.3 մլն դոլարի դիմաց։ Ապրիլին ընկերությունն ակնկալում էր ունենալ 270–ից 280 մլն դոլարի միջակայքի հասույթ, իսկ Thomson Reuters–ի հարցմանը մասնակցած վերլուծաբաններն ավելի լավատես էին և նշում էին 283.1 մլն դոլարը։
Ներդրողներին, սակայն, ավելի մտահոգում է Twitter–ի օգտագործողների լսարանի աճը, որը կարող է դառնալ ընկերության երկարաժամկետ կենսունակության ազդանշան, որն առաջվա պես շահույթ չի բերում։ Նրա եռամսյակային վնասն ավելացել է մինչև 144.6 մլն դոլար, կամ 24 ցենտ մեկ բաժնետոմսի դիմաց նախորդ տարվա 42.2 մլն դոլարից կամ մեկ բաժնետոմսի դիմաց 32 ցենտից։
Առանց հաշվի առնելու բաժնետոմսերով պարգևավճարները և ծախսերի այլ հոդվածները` հասույթը կազմել է 2 ցենտ մեկ բաժնետոմսի դիմաց նախորդ տարվա 12 ցենտի դիմաց։ Վերլուծաբաններն ակնկալում էին, որ Twitter–ը եռամսյակը կավարտի մեկ բաժնետոմսի դիմաց մոտ 1–տոկոսանոց վնասով։
Twitter–ը հայտարարել է, որ մարտի 31–ից նրա ամսական ակտիվ օգտագործողների, այսինքն` նրանց թիվը, ովքեր իրենց էջն այցելում են ամսվա մեջ ոչ պակաս, քան մեկ անգամ, աճել է 16 միլիոնով` հասնելով 271 միլիոնի։ Աճը կազմել է 6.3 տոկոս` նախորդ եռամսյակի 5.8 տոկոսի դիմաց։ -0-
Ծանոթացեք լուրերին առաջինն ու քննարկեք դրանք մեր Telegram-ում
16:43 30.07.2014