Microsoft–ն ազատվում է Nokia բջջային ապրանքանիշից
ԵՐԵՎԱՆ, 23 հոկտեմբերի. /ԱՌԿԱ/. Microsoft ամերիկյան ընկերությունը, այնուամենայնիվ, մտադիր է ազատվել Nokia ապրանքանիշից։ Այդ մասին առաջին լուրերը հրապարակվել էին դեռ մի քանի ամիս առաջ, սակայն այս շաբաթ նոր հաստատումներ կան, որ շուտով Nokia Lumia–ն կվերանվանվի Microsoft Lumia–ի, գրում է Vestifinance.ru–ն։
Nokia France–ի` Facebook–ի պաշտոնական էջում հաղորդագրություն է հրապարակվել, որ առաջիկա օրերին այս էջը կվերանվանվի Microsoft Lumia–ի։ The Verge–ի լրագրողների հետ զրույցում Microsoft–ի մամուլի ծառայությունում հաստատել են, որ առաջիկա շաբաթներում վերանվանում կկատարվի նաև այլ երկրներում։
Հիշեցնենք, որ Microsoft–ը Nokia բջջային բիզնեսը գնել է այս տարվա ապրիլին։ Բջջային սարքերի վրայից հենց Nokia բառի անհետացումից բացի, նույն ճակատագիրը կարող են ունենալ նաև մյուս անվանումները, օրինակ` Lumia–ն, Asha–ն, Nokia X–ը և Series 40–ը։
Եթե դա կատարվի, ապա լեգենդար Nokia ապրանքանիշը վերջնականապես կլքի բջջային հեռախոսների շուկան։ Սակայն պետք չէ մոռանալ, որ ընկերությունն առաջվա պես գոյություն ունի առանձին և զբաղվում է հեռահաղորդակցային սարքավորումների արտադրությամբ։ Nokia–ի բիզնեսի այս մասը Microsoft–ի ճանկը դեռ չի ընկել։
Ի դեպ, Microsoft–ի գործող գլխավոր տնօրեն Սատյա Նադելան այդքան էլ գոհ չէ
Nokia բջջային բիզնեսի գնումից, որն իրականացրել էր նրան նախորդած Սթիվ Բալմերը։
Բացի այդ, Նադելան չի պատրաստվում ընթանալ ապարատային և ծրագրային ապահովման ինտեգրման ուղղությամբ, ինչը ցանկանում էր Բալմերը, իսկ դրա փոխարեն մտադիր է շեշտը դնել ամպային և բջջային տեխնոլոգիաների զարգացման վրա։
Փորձագետները կարծում են, որ Nokia–ի ակտիվները, այդ թվում մասնագետները, տեխնոլոգիաներն ու պատենտները, չեն օգնի Microsoft–ին իր նոր ռազմավարության մեջ, այդ պատճառով ամերիկյան կորպորացիան կզարգացնի բջջային բիզնեսն առանց ֆինական ապրանքանիշի օգնության։ Ավելի վաղ նշվում էր, որ Microsoft–ը ծրագրում է բջջային հեռախոսներ արտադրող սեփական ստորաբաժանումն առանց վնասի աշխատող ստորաբաժանում դարձնել առաջին երկու տարիների ընթացքում։
Nokia ֆինական ընկերության սրընթաց անկումը սմարթֆոնների շուկայում դասական օրինակ է, թե ինչպես հնարավոր է զրկվել գլոբալ բիզնեսից` ընկնելով մեկ այլ խոշոր IT-կոնցեռնի հետ համագործակցության հետևից` ի վնաս սեփական շահերի։
Kaupaleht ֆինական բիզնես–պարբերականի լրագրողներ Պեկա Նյուկյանենը և Մերինա Սալմինենը, ում հարցազրույց են տվել Nokia–ի ավելի քան 100 աշխատակիցներ, Operation Elop վերնագրով գիրք են գրել։
Հեղինակները համաձայն չեն այն կարծիքին, որ Nokia–ի նախկին ղեկավար Սթիվեն Էլոպը դիտավորյալ է գցել ընկերությունը Microsoft–ի ձեռքը և նպաստել դրա փաստացի մահվանը։ Նրանց կարծիքով, Էլոպը պարզապես «աշխարհի ամենավատ ղեկավարն է»։ -0-
Ծանոթացեք լուրերին առաջինն ու քննարկեք դրանք մեր Telegram-ում
16:40 23.10.2014