Google–ը` գաղտնաբառերի դեմ. կայքերի հասանելիության USB–բանալիների վաճառքը մեկնարկել է
ԵՐԵՎԱՆ, 22 հոկտեմբերի. /ԱՌԿԱ/. Google–ը հայտարարել է, որ իր կայքերում ֆիզիկական USB–բանալու օգտագործմամբ երկֆակտորային իսկությունը ստուգող գործառույթ է կիրառելու։ Բանալին կարելի է գնել Amazon–ից։ Այժմ խանութում ներկայացված է 6-60 դոլար արժողության բանալիների երեք մոդել, գրում է Cnews.ru–ն։
Բոլոր բանալիներն օգտագործում են FIDO Alliance–ի մշակած Universal 2nd Factor (U2F) բաց պաշտպանությունը։ Բանալին կարելի է օգտագործել ցանկացած կայքում (ոչ միայն Google), որը կավելացնի այդ պաշտպանության հնարավորությունը։
USB–բանալին տեղադրում չի պահանջում` բավական է համակարգչում կայքի գաղտնաբառը մուտքագրելուց հետո այն տեղադրել USB–բնիկում։ Բոլոր բանալիներն աշխատում են Windows–ով, OS X–ով, Linux–ով և Chrome OS–ով։ USB–բանալիով աշխատելու համար անհրաժեշտ է օգտագործել Google Chrome 38 և ավելի բարձր տարբերակներ։
USB–բանալիների օգտագործումն ամբողջովին անվճար է, սակայն օգտագործողները պետք է այն ձեռք բերեն իրենց հաշվին։ Բանալիները տարբերվում են դիզայնով։ Ամենաթանկը` 60–դոլարանոց մոդելը, զինված է Java Card տեխնոլոգիայով։
«Սովորաբար Google–ը հաստատում է ուղարկում հեռախոսահամարին կայքէջ մտնելու փորձի դեպքում, որպեսզի մենք կարողանանք համոզվել, որ դա հենց դուք եք։ Սակայն խորամանկ ցանցահենները հաճախ ստեղծում են Google կրկնօրինակ–կայքեր, որ իմանան ձեր հաստատման կոդերը»,– պատմել են ընկերությունում։
Հաստատման կոդով կարճ հաղորդագրություն ուղարկելու միջոցով երկֆակտորային իսկությունը ստուգող գործառույթը Google գործարկել է 2011 թվականին։ 2013 թվականի հունվարին կորպորացիան հայտնել է, որ ծրագրում է ֆիզիկական միջոցներ մշակել և առաջարկել անձը հաստատելու համար։ Մասնավորապես, հենց այն ժամանակ խոսք գնաց USB-բանալիներով Google–ի ծառայությունների հասանելիության մասին։ -0-
Ծանոթացեք լուրերին առաջինն ու քննարկեք դրանք մեր Telegram-ում
19:05 22.10.2014