Հայաստանը և Մայքրոսոֆթ ընկերությունը Փոխըմբռնման նոր հուշագիր են ստորագրել
ԵՐԵՎԱՆ, 2 հոկտեմբերի. /ԱՌԿԱ/. ՀՀ կառավարությունը և Մայքրոսոֆթ ընկերությունը Նյու Յորքում անցկացված Բարձր տեխնոլոգիաների ամենամյա յոթերորդ ԱրմԹեք 2014 համաժողովի շրջանակներում Փոխըմբռնման նոր հուշագիր ստորագրեցին:
Ինչպես «ԱՌԿԱ» գործակալությանը հայտնեցին «Ձեռնարկությունների ինկուբատոր» հիմնադրամի (EIF) մամուլի ծառայությունից, հուշադիրն ուղղված է Հայաստանում ինովացիոն և գիտահետազոտական ծրագրերին աջակցությանը, ՏՏ ոլորտի զարգացմանն ուղղված նոր հեռանկարային ծրագրերի իրականացմանը:
Հուշագրով նախատեսված է նաև մտավոր սեփականության և հեղինակային իրավունքի, ծրագրային փաթեթների օրինականացմանn ուղղված հարցերով համագործակցություն:
Ինչպես հայտնեցին EIF-ից, ստեղծվել է համատեղ աշխատանքային խումբ, որը երկու ամսվա ընթացքում կհստակեցնի համատեղ իրականացվող ծրագրերը, և դրանց հիման վրա կստորագրվեն նոր հուշագրեր:
Վարչապետ Հովիկ Աբրահամյանը «Մայքրոսոֆթ» ընկերության Կենտրոնական և Արևելյան Եվրոպայի նոր շուկաների գլխավոր մենեջեր Փիլար Թորեսին հետ սեպտեմբերի 10-ի հանդիպման ժամանակ առաջարկել է քննարկել նոր ուղղություններով երկարաժամկետ համագործակցության և Հայաստանում ՏՏ ոլորտի զարգացմանն ուղղված նոր հեռանկարային ծրագրերի իրականացման հնարավորությունները: Մասնավորապես, կառավարության ղեկավարն անդրադարձել է «Մայքրոսոֆթ» ինովացիոն կենտրոնի հենքի վրա «Մայքրոսոֆթ Վենչուրս» աքսելերատոր ստեղծելու և մոբայլ լուծումների/մշակումների կենտրոն հիմնելու հնարավորություններին:
Microsoft կորպորացիան համագործակցում է Հայաստանի հետ 2007 թ.-ի հունվարի 30-ին Շոտլանդիայի Էդինբուրգ քաղաքում ստորագրված համաձայնագրի համաձայն: Microsoft-ը Հայաստանում իրականացնում է մի շարք ներդրումային, կրթական և նորարարական ծրագրեր, որոնց թվում էր նաև Հայաստանում Microsoft ինովացիոն կենտրոնի բացումը: –0--
Ծանոթացեք լուրերին առաջինն ու քննարկեք դրանք մեր Telegram-ում
17:41 02.10.2014
