Ngarapka dipilih nyadi chalun, Nyitar mega diperita ngenyakahka diri betemu enggau rayat di Pelagus
SIBU: Ex-chalun Barisan Nasional (BN) ba sitak Kunsil Nengeri (DUN) Pelagus maya pengawa bepilih kunsil nengeri (PRN) 2011 suba, Stanley Nyitar diperitaka berengkah ngenyakahka diri betemu enggau rayat dalam awak ngulihka peluang nyadi chalun PRN ke deka datai tu ila.
Tu nunjukka Stanley mega nyelinting awak nyadi chalun ba sitak nya begulai enggau Sekretari Politik Kepala Menteri Wilson Nyabong Ijang sereta seiku orang dagang ke mega kaban pemesai komiti Parti Rakyat Sarawak (PRS), Datuk Kristoffer Nyuak Bajok.
Taja pan pia, sapa bagi chalun ke bendar DUN Pelagus ke deka bediri ba PRN ti deka datai agi rapas dipeda sereta empai ulih ditentuka enggau nyentuk sekalika Wilson, Kristoffer tauka Stanley.
Nitihka penerang ari seiku pengundi di Sungai Amang Pelagus, Moses Ripai madah, Stanley diatu udah berengkah bejalalai ngabas serata pelilih menua Pelagus ke alai iya udah belabuh bekimpin kenyau ari taun nyin kemari.
Tang ku iya, penatai Stanley enda dikemesaika sebarang media ke ngujungka mensia mayuh enda nemu iya ngembuan juluk ati dichalunka sekali agi ba sitak DUN Pelagus.
“Stanley seiku chalun ke chukup baruh ati sereta ngemeratka rayat. Iya ti ke bendar chukup patut nyadi chalun BN ba sitak DUN pelagus. Iya chalun ke ngembuan mayuh potensi,” ku iya madah ngagai raban pemberita ditu, kemari.
Lebuh ditanya nama kebuah Stanley patut betanding enti dibandingka enggau Wilson enggau Kristoffer, Moses madahka Stenley seiku peranak asal menua Pelagus.
“Wilson enggau Kristoffer kebendar iya peranak asal pelilih menua Balleh sereta dipeda enda tentu patut dichalunka ba penuduk DUN Pelagus.
“Sitak Pelagus ungkup orang Pelagus. Chalun ke dikearap bediri ngarika sitak nya patut peranak asal Pelagus empu. Stanley meh chalun ke ngembuan pematut bediri,” pia ku tandu iya.
Ku Moses, tajapan Stanley alah ba PRN ti ke udah, ukai reti nya iya lemi tauka ngembuan pengurang ari sekeda sukut.
Ku iya, perintah BN mega kala enchalunka chalun ke kala alah ba pengawa bepilih sebedau tu, tang lebuh dichalunka baru sida tau menang.
“Chalun ‘kitar semula’ agi ngembuan pematut. Pia mega enggau Stanley, iya patut diberi awak bediri di sitak Pelagus. Ngarapka PRS ulih meri sukung ke tegap ngagai iya ba PRN ti deka datai.
“Tajapan kala alah, ukai reti nya iya deka alah belama. Beri meh peluang ngagai iya laban kami di Sungai Amang, Pelagus semampai nyukung Stanley nyadi chalun BN ti ngarika sitak Pelagus ba PRN ti deka datai,” ku iya.
Stanley dichalunka PRS-BN ba ujung-ujung pengawa bepilih taun ti ke udah, ku Moses.
Empai lama ke udah, Stanley bisi ngulu sebengkah pengerami ke diatur ba Rumah Ganya di Sungai Amang, Pelagus sereta betemu enggau rayat di peilih menua nya.
Kelimpah ari nya, Stanley mega bisi ngulu sekeda pengerami bukai ke bisi diaatur di serata Pelagus dikena ngulihka sukung ari rayat.
Beserimbai enggau pengawa bepilih taun ti ke udah, sitak DUN Pelagus mantaika tiga iku chalun ke betanding iya nya, Stanley Nyitar nengah tiket PRS-BN, George Lagong (Bebas) sereta Edward Sumbang Asun ari Parti Keadilan Rakyat (PKR).
Ba pemutus undi ke bisi dirikod, Stanley mujur bulih 2,903 undi, George bulih 5,740 undi sereta Edward 1,171 undi.
George ari parti Bebas menang ba DUN Pelagus nengah majoriti 2,837 undi.