«Խնձորի» սեզոնը. Apple-ի գլխավոր պրեմիերաները

ԵՐԵՎԱՆ, 29 օգոստոսի. /ԱՌԿԱ/. Պաշտոնական հաստատումը ստացվել է.  Apple-ը հայտնել է, որ հատուկ մամուլի ասուլիս կհրավիրի սեպտեմբերի 9-ին: Մենք կտեսնենք մի շարք նորույթներ, որոնցից մեկը երկար սպասված iPhone 6-ն է: Աշնանային «խնձորի» բերքից հիմնականում կախված կլինի ընկերության հաջորդ տարվա ճակատագիրը, գրում է Vestifinance.ru-ն:

Apple-ն ասուլիսի հրավերներ է ուղարկել, բայց չի հայտնել, թե կոնկրետ ինչ է ներկայացնելու։ Նամակներում միայն ամսաթիվն է և Wish we could say more խորհրդավոր արտահայտությունը («Կցանկանայինք ձեզ ավելին ասել»): Թեև Apple-ը լռում է, փորձագետներն արդեն որոշել են այն սարքերի ցուցակը, որոնք կարող են ներկայացվել լսարանին:

1. iPhone 6

iPhone-ն Apple-ի շարքի գլխավոր սարքն է, որին, առաջվա պես, բաժին է ընկնում ընկերության հասույթի առյուծի բաժինը: Հենց այս պատճառով են սմարթֆոնի նոր մոդելները թողարկվում խիստ ժամանակացույցով, որը ժամանակի ընթացքում ավելի հասկանալի է դառնում բաց շուկայի համար: Այսպես, նախորդ աշնանը ցուցադրվել են iPhone 5S-ը և 5C-ը: Ավելին, հաճախ խոսքը սեպտեմբերի երկրորդ երեքշաբթի օրվա մասին է, այնպես որ ինը թիվը գերազանց կերպով տեղավորվում է «խնձորի» ծանուցումների ժամանակացույցում:

Այս շաբաթ հրապարակվել են iPhone 6-ի օգտագործման ցուցումները, որոնց վրա երևում են դիզայնի առանձնահատկությունները: Մասնավորապես, սարքի անջատման/միացման կոճակը տեղադրված է ոչ թե վերևում, ինչպես սովորաբար, այլ աջ կողմում: Ինչի՞ մասին դա կարող է խոսել: Նախևառաջ, սմարթֆոնի չափի մասին:

Ամռան կեսին մի շարք պարբերականներում տեղեկություն է հայտնվել, որ Apple-ը որոշում է ընդունել 70-80 մլն iPhone 6-ի երկու տարբերակ կհավաքի` 4,7 և 5,5 դյույմանոց էկրանով: Դա Apple-ի պատմության և, ամենայն հավանականությամբ, գաջեթների ամբողջ ինդուստրիայի ամենախոշոր պատվերն է: Ընկերությունն արդեն զարմացրել է իր ծրագրերի մասշտաբայնությամբ`երբ շուկայում հայտնվեցին iPhone 5S և 5C, ասիական գործարանները 50 մլն-ից 60 մլն սմարթֆոն են արտադրել:

2. 12.9 դյույմանոց էկրանով iPad

Վաղուց են պտտվում լուրերը, թե Apple-ն աշխատում է մեծ էկրանով նոր iPad-ի վրա: Երեքշաբթի տեղեկությունը հաստատվել է` Bloomberg գործակալությունը հայտնել է, որ Apple-ը ծրագրում է շուկա հանել 12,9 դյույմ էկրանով iPad նոր պլանշետ 2015 թվականի սկզբին: Սակայն մի շարք ինսայդերներ պնդում են, որ պրեմիերան կկայանա հենց սեպտեմբերի 9-ին: Ժամանակակից iPad Air –ի էկրանն 9,7 դյույմ է, iPad Mini –ինը` 7,85 դյույմ:

Բոլոր վերլուծաբանները միակարծիք են, որ 12,9 անկյունագծով էկրանով iPad-ի տարբերակը պետք է նոր լսարան ներգրավելու համար, եթե առկա լսարանը չի ցանկանում թարմացնել իր սարքերը: Խոսքը կարող է լինել ոչ թե տանը, այլ գրասենյակում օգտագործելու համար նախատեսված iPad-ի մասին: Հիշեցնենք, որ Apple-ը վերջերս համաձայնագիր է ստորագրել IBM-ի հետ և հույս ունի դրա օգնությամբ ավելացնել iPad-ի վաճառքները կորպորատիվ միջավայրում:

3. iWatch

Նախորդ ամիս Apple-ը պատենտ է ստացել, որում «խելացի» ժամացույցի սխեման է: Իրականում, մենք չգիտենք, արդյո՞ք, նոր սարք iWatch կկոչվի: Այդ անունը հնարել են երկրպագուները, հիշենք iPad-ի հետ կապված պատմությունը, որը մինչև ծանուցումը բոլոր ԶԼՄ-ներն անվանում էին iSlate: Բայց այժմ հստակ հայտնի է, որ Apple-ի սարքն առասպել չէ, այլ իրականում մշակվող սարք: Այն, ինչ մենք տեսանք, տպավորում է: Իհարկե, ստանդարտ ֆունկցիաները կան` հպում, աքսելերաչափ, նավիգացիա, Bluetooth, վիբրացիայի օգնությամբ հաղորդագրությունների մասին իրազեկում: Սակայն կա նաև առանձնահատկություն` iWatch-ը հնարավոր կլինի օգտագործել նաև առանց հեռախոսին միացնելու:

Apple-ի ղեկավար Թիմ Կուկը նախորդ տարվա D11 համաժողովում հայտարարել էր, որ կրվող սարքերը «աննկարագրելի հետաքրքիր են», բայց բացի հիացմունքից այլ բան չէր ասել: Հայտնի է, որ ընկերությունն իր հաստիքի մեջ է «քաշում» կրվող էլեկտրոնիկայի, կենսաչափական համակարգերի և նորաձևության փորձագետներին: Նրանց թվում է Tag Heuer-ի ավագ մենեջեր Պատրիկ Պրունիեն, Nike Fuel Band-ի դիզայնի տնօրեն, մշակման պատասխանատու Բեն Շաֆերը, ինչպես նաև Burberry-ի նախկին աշխատող Անջելա Արենդսը:

Միաժամանակ Android օպերացիոն համակարգի հիման վրա աշխատող սարքերն աստիճանաբար գրավում են շուկան: Եվ եթե Apple-ի սմարթֆոններն առաջվա պես հատուկ տեղ են զբաղեցնում, որտեղից նրան չկարողացավ դուրս մղել Samsung-ը, ապա կրվող սարքերի ոլորտում իրավիճակն ավելի վատն է, քան պլանշետների հետ կապված` այստեղ «Խնձորը» հետ է մնում մրցակիցներից, ընդ որում` էապես: WWDC-ի ցուցահանդեսում ցուցադրվել են կենսաչափական վերահսկողության համակարգեր և HealthKit և HomeKit «խելացի» տան կառավարման համակարգերը: Բայց մի սարք, որը կարող էր ամբողջովին օգտագործել դրանց հնարավորությունները, առայժմ գոյություն չունի: -0-

Ծանոթացեք լուրերին առաջինն ու քննարկեք դրանք մեր Telegram-ում

15:29 29.08.2014