Apple սարքերի համար նախատեսված հայկական ստեղնաշարն արդեն անվճար է
ԵՐԵՎԱՆ, 29 սեպտեմբերի. /ԱՌԿԱ/. Apple սարքերի համար նախատեսված հայկական ստեղնաշարն արդեն անվճար է, նշվում է ՀՀ ԿԳ նախարար Արմեն Աշոտյանի Facebook-ի պաշտոնական էջում:
ՀՀ ԿԳ նախարարը դեռ 2013 թ.-ի սկզբին Facebook սոցցանցի միջոցով Apple ընկերության գործադիր տնօրեն Թիմ Կուկին առաջարկել էր մշակել iPad-ի համար նախատեսված հայկական ստեղնաշար: Իր առաջարկում նախարարը նշել էր, որ Apple ընկերության շարժական սարքերը օրեցօր ավելի մեծ տարածում են ստանում ինչպես Հայաստանում, այնպես էլ արտերկրում բնակվող հայերի շրջանում:
Սակայն iPad-ը, որից օգտվում են դասախոսներն ու ուսանողները, հնարավորություն չի տալիս աշխատել և շփվել հայերենով, քանի որ օպերացիոն համակարգը (iOS) ապահովված չէ հայկական ստեղնաշարով:
«Ինչպես հիշում եք, ՀՀ ԿԳՆ-ն բանակցում էր APPLE սարքավորումների համար առաջին հայատառ ստեղնաշարի ստեղծողների հետ այն անվճար դարձնելու մտադրությամբ: Շտապում եմ ձեզ ուրախացնել, որ մեր համատեղ ջանքերով այսօրվանից HayTar հավելվածը անվճար է բոլոր օգտատերերի համար», - նշում է Աշոտյանը:
Նախարարը շնորհակալություն է հայտնել ծրագրի հեղինակներին և ընդգծել, որ այսուհետ հայ օգտատերերը կարող են վայելել մայրենի լեզվով համացանցային շփումները:
Նա նաև ընդգծել է, որ այս նախաձեռնության համար ֆինանսական միջոցներ չեն հատկացվել:
HayTar հավելվածը ստեղծվել է հայ մշակողների կողմից, որը հատուկ նախատեսված է apple-ի կողմից օգտագործվող օպերացիոն համակարգի համար:
Android օպերացիոն համակարգում նման դժվարություններ չեն ծագում, քանի որ այնտեղ ի սկզբանե հայերեն տեքստ գրելու հնարավորություն կա:-0-
Ծանոթացեք լուրերին առաջինն ու քննարկեք դրանք մեր Telegram-ում
17:10 29.09.2014