Չինաստանը բացել է ցամաքային ռոբոտների մշակման կենտրոն
ԵՐԵՎԱՆ, 24 հուլիսի. /ԱՌԿԱ/. NORINCO չինական մեքենաշինական կորպորացիան բացել է ցամաքային ռոբոտների մշակման հետազոտական կենտրոն, որոնք հեռանկարում կներառվեն Չինաստանի ժողովրդական ազատագրական բանակի սպառազինության մեջ։ Ինչպես հայտնում է Jane's–ը, կենտրոնը բացվել է 2014 թվականի հունիսի վերջին, սակայն այդ մասին հայտնի է դարձել միայն այժմ։ Ձեռնարկությունում մշակած տեխնիկան կարտահանվի, գրում է Lenta.ru–ն։
Հետազոտական կենտրոնը մտադիր է համատեղ մշակման և տեխնոլոգիաների փոխանցման մասին համաձայնագիր ստորագրել օտարերկրյա կոնստրուկտորական բյուրոյի հետ։ Մասնավորապես, խոսքը Գերմանիայի, Ռուսաստանի և Ֆինլանդիայի ընկերությունների մասին է։ NORINCO–ի դուստր CNVRI ընկերության փոխտնօրեն Մեն Խունի գնահատմամբ` Չինաստանին կպահանջվի նվազագույնը հինգ տարի ամերիկյան մշակումների հետ համադրելի ցամաքային ռոբոտների տեխնոլոգիաներ ստեղծելու համար։
Վերջին մի քանի տարիների ընթացքում Չինաստանի իշխանությունները մեծ ուշադրություն են հատկացնում հեռակառավարվող զանազան համակարգերի, առավելապես, անօդաչու թռչող սարքերի մշակմանը։ Ավելի վաղ երկրում արդեն սկսել են աշխատել կոնստրուկտորական մի քանի տասնյակ բյուրոներ, որոնք զբաղվում են տարբեր կարգի անօդաչուների ստեղծմամբ։ Այդ բյուրոները վերահսկում են չինական AVIC և CASIC կորպորացիաները։ -0-
Ծանոթացեք լուրերին առաջինն ու քննարկեք դրանք մեր Telegram-ում
18:42 24.07.2014
