«ԱրմենՏելի» ֆիքսված կապի սակագները սեպտեմբերի 1–ից կնվազեն

ԵՐԵՎԱՆ, 1 սեպտեմբերի. /ԱՌԿԱ/. «ԱրմենՏել» ընկերության (ապրանքանիշը` Beeline) ֆիքսված կապի սակագները սեպտեմբերի 1–ից կնվազեն։

Հայաստանի հանրային ծառայությունները կարգավորող հանձնաժողովը հուլիսի 29–ի նիստում նվազեցրել է «ԱրմենՏել» ընկերության ֆիքսված կապի սակագները։

Մասնավորապես, անվճար րոպեների փաթեթի օգտագործումից հետո (360 րոպե բազային փաթեթում) Beeline ֆիքսված կապի համարների բոլոր ելքային զանգերը կարժենան մեկ րոպեի դիմաց 5 դրամ/րոպե (ներառյալ ԱԱՀ-ն):

Փաստորեն, Հայաստանի տարածքում միջքաղաքային զանգերի և ԼՂՀ ֆիքսված կապի համարների զանգերի մեկ րոպեն կարժենա 5 դրամ (ներառյալ ԱԱՀ)` նախկին  ֆիզիկական անձանց համար գործող 20 դրամ մեկ րոպեի ցերեկային ժամերին (24 դրամ` իրավաբանական անձանց համար) և 14 դրամ` գիշերային ժամերին (16,8 դրամ` իրավաբանական անձանց համար) փոխարեն։

Տեղական զանգերի համար 1601-րդ րոպեից սկսած գործող՝ 9 դրամ/րոպե (ներառյալ ԱԱՀ-ն) սակագնի փոխարեն կսահմանվի 5 դրամ/րոպե (ներառյալ ԱԱՀ-ն):

Նոր սակագներն ավտոմատ ռեժիմով կկիրառվեն Հայաստանում Beeline ֆիքսված հեռախոսակապի բոլոր բաժանորդների նկատմամբ։

Նաև բաժանորդավճարի դիմաց տրամադրվող անվճար րոպեների չափաքանակները 2015 թվականի հուլիսի 1-ից սկսած հնարավոր է կիրառել նաև միջքաղաքային զանգերի նկատմամբ։

«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։–0–

Ծանոթացեք լուրերին առաջինն ու քննարկեք դրանք մեր Telegram-ում

15:55 01.09.2014