Grace dapat mag-inhibit sa Mamasapano probe - Leni
MANILA, Philippines – Dapat mag-inhibit si Sen. Grace Poe sa muling imbestigasyon ng Mamasapano incident.
Ito ang paniwala ni Liberal Party (LP) vice presidential candidate Leni Robredo, na sinabing mahahaluan ng pulitika ang imbestigasyon kung hindi mag-iinhibit si Poe.
“Sana [mag-inhibit] para hindi nagagamit ang politika sa trabaho,” wika ni Robredo sa isang news forum sa Quezon City nang tanungin ukol sa reinvestigation na nakatakda sa Jan. 25.
Ayon kay Robredo, ngayong papalapit na ang kampanya, sinabi niyang mag-ingat ang mga pulitiko sa anumang kilos na baka akalaing pamumulitika lang.
“Palaging magiging suspicious ang aming ginagawa dahil ba sa gusto lang namin mapalawig ang popularity. Sana umiwas na ang trabaho ay magagamit sa pulitika,” giit ni Robredo.
Bago rito, tinutulan ni Robredo ang muling pagbubukas ng Mamasapano probe, sa pagsasabing lahat ng pagsisikap upang mailabas ang katotohanan ukol sa masaker ng 44 Special Action Force (SAF) personnel ay ginawa na sa mga nakalipas na pagdinig.
Nalungkot din si Robredo dahil hanggang ngayon, wala pang napapanagot sa nasabing insidente.
- Latest