Leni: Requirement sa annulment ng kasal pagaanin
MANILA, Philippines - “Mahirap na nga at sinasaktan, pahihirapan pa sila ng mahal na psychological test.”
Dahil dito kaya nais ni Liberal Party (LP) vice presidential candidate Leni Robredo na pag-aralan ang proseso sa pagpapawalang-bisa ng kasal upang maging madali sa kababaihan, lalo na sa mga nakararanas ng pag-abuso sa asawa.
Sa ilalim ng Article 36 ng Family Code of the Philippines, sinabi ni Robredo na “psychological incapacity” lang ang tanging dahilan na pinapayagan ng batas para mapawalang bisa ang kasal.
Para ito’y mapatunayan, ipinaliwanag ni Robredo na kailangang sumailalim ang mag-asawa sa psychological tests na kadalasa’y umaabot sa P100,000.
“Paano na kung walang perang pambayad ang babae para sa psychological test? Ang resulta, magtitiis na lang siyang manatiling kasal sa asawang nananakit o nang-aabuso,” wika ni Robredo.
Bago rito, iniakda ni Robredo ang House Bill No. 2854 na naglalayong isama ang kalupitan at pananakit sa asawa at anak bilang dahilan ng pagpapawalang bisa ng kasal.
- Latest