Attack aircraft, helicopters, 200 tauhan ng US maiiwan sa Pinas

MANILA, Philippines — Upang mapaigting ang pagbabantay sa pinag-aagawang teritoryo, nasa 200 tauhan ng US military ang magpapaiwan sa bansa sa pagtatapos ng Balikatan exercise, ayon sa United States Defense.

Sinabi ni Defense Sec. Ash Carter ngayong Huwebes na bahagi ito ng pagpapatibay ng samahan ng Pilipinas at Amerika at upang mabantayang maigi ang South China Sea.

Bukod sa 200 tauhan, maiiwan din sa bansa ang limang A-10 Thunderbolt attack aircraft, tatlong HH-60G Pave Hawk search and rescue helicopters at isang MC-130H Combat Talon.

Mananatili ang mga ito sa Clark Air Base sa Pampanga at sabi ni Carter ay paunang tulong pa lamang ito para matiyak ang kapayapaan at seguridad sa bansa.

"These patrols will continue to help build our interoperability and improve the Philippine Navy. Even as these patrols contribute to the safety and security of the region's waters," pahayag ni Carter.

"With these steps, we'll make a strong alliance, even stronger," dagdag niya.

Ang lahat ng ito ay bahagi ng napag-usapan nina Department of National Defense Secretary Voltaire Gazmin, US State Secretary John Kerry at dating Philippine Foreign Affairs Secretary Albert del Rosario sa Washington nitong Enero.

Sa pagbisita ni US President Barack Obama sa bansa noong 2014 ay nilagdaan ng dalawang bansa ang Enhanced Defense Cooperation Agreement na naglalayong magtatayo  ng mga pasilidad sa limang base ng Pilipinas.

Napili ang limang lugar na – Antonio Bautista Air Base sa Puerto Princesa, Palawan malapit sa South China Sea, Mactan-Benito Ebuen Air Base sa Visayas, Lumbia Air Base sa Mindanao, Subic Bay at Clark Air Base.