Duterte hindi sasayangin ang oras kay Trillanes

MANILA, Philippines — Walang balak ireklamo ng kampo ni Davao City Mayor Rodrigo Duterte si Sen. Antonio Trillanes IV sa paratang na may tinatagong yaman ang alkalde.

Sinabi ng tagapagsalita ni Duterte na si Peter Laviña na sayang lamang sa kanilang oras ang paghahain ng kasong libelo sa senador.

Sa pagsisiwalat ni Trillanes na may P211 milyon umano si Duterte sa isang banko sa Metro Manila, hinamon niya ang alkalde na kasuhan siya kung sa tingin niya ay hindi ito totoo.

Ang naturang halaga ay hindi umano idineklara ni Duterte sa kaniyang 2014 Statement of Assets and Liabilities at kung mapatunayan ni Duterte na nagsisinungaling si Trillanes ay handa ang senador na magbitiw sa pwesto.

BASAHIN: P211M undeclared sa SALN: Wala kayong ideya kung gaano kayaman si Duterte – Trillanes

Samantala, naniniwala si Laviña na dapat magpaliwanag ang banko na isinasangkot ni Trillanes.

"We will consult the lawyer if we will ask (Bank of the Philippine Islands) to issue a statement because no less than the name of the bank has been dragged into this. They have to issue a statement whether this is correct or not," sabi ni Laviña sa ABS-CBN News Channel.

Aniya paninira lamang ito laban sa presidential candidate upang mahila siya pababa lalo na’t nangunguna siya sa survey.

"It's part of the smear campaign being raised against the mayor especially right now. His opponents are practicing crab mentality, trying to pull him down with all these baseless accusations," dagdag ng tagapagsalita.

Nauna nang sinabi ni Trillanes na bahagi ng kaniyang trabaho ang pagsisiwalat ng mga tinatagong yaman umano ni Duterte.