Duterte nangunguna sa lahat ng social class sa Pulse Asia survey

MANILA, Philippines – Mahirap man o mayaman si Davao City Mayor Rodrigo Duterte ang pinili para maging susunod na pangulo ng bansa.

Sa pinakabagong Pulse Asia presidential survey na isinagawa noong Abril 16 hanggang 20, nakakuha si Duterte ng 35 percent para manguna.

Mula sa 1,800 respondents, 43 percent ng mga mula sa Class ABC ang pinili si Duterte, habang 32 percent naman ang galing sa Class D, at 40 percent sa Class E.

BASAHIN: Duterte nanguna pa rin sa SWS sa kabila ng rape ‘joke’

Lalong lumalaki ang agwat ni Duterte sa kaniyang mga kalaban kung saan 12 puntos ang kaniyang kalamangan sa pumapangalawang si Sen. Grace Poe na may 23 percent.

Malayung-malayo naman sina Liberal Party standard-bearer Manuel “Mar” Roxas II at United Nationalist Alliance standard-bearer Vice President Jejomar “Jojo” Binay na may 17 percent at 16 percent.

Nananatili sa ilalim si Sen. Miriam Defensor-Santiago na may two percent.

Pinakamalakas din si Duterte sa Mindanao kung saan 58 percent ng mga respondents ang pumili sa kaniya, habang 40 percent at 28 percent sa Metro Manila  at Balance Luzon at 32 percent sa Visayas.

Hindi naman nakaapekto ang kontrobersyal na rape ‘joke’ ni Duterte sa kaniyang kandidatura.