P40 flagdown sa taxi ibinalik ng LTFRB

MANILA, Philippines – Balik sa P40 ang flagdown rate sa taxi units sa Metro Manila mula sa P30.00.

Inutos ito ng Land Transportation Franchising and Regulatory Board (LTFRB) habang binubusisi ang naisampang reklamo sa ahensiya ng mga operator at driver ng taxi laban sa ginawang pagbababa kamakailan ng flagdown rate na P30.

Sinabi ni LTFRB Chairman Winston Gines, bibigyang daan nila ang pagbusisi sa reklamo ng Stop and Go Transport group na nagfile ng petisyon sa ahensiya para maibalik sa P40 ang flagdown sa taxi.

Ikinatwiran ng mga complainant na hindi makatwiran ang pagbaba sa singil sa taxi dahil mataas pa rin ang kanilang bayarin sa LTO at LTFRB, maintenance fee at spare parts kahit na bumaba ang presyo ng gasolina na dahilan ng ahensiya para bawasan ng P10 ang flagdown sa taxi units sa bansa laluna sa Metro Manila.

Gayunman, tanging Metro Manila lamang ang balik sa P40 ang flagdown rate.