Nurse sa bawat public school giit

MANILA, Philippines – Isinusulong ni Quezon City Rep. Alfred Vargas ang isang panukalang batas na nagtatalaga ng isang rehistradong nurse sa bawat isang pampublikong eskwelahan sa bansa.

Sa House Bill 6489 ni Vargas, iginiit nito na ang basic health service ang isa sa pinaka importante sa mga eskwelahan para masigurong laging nasa maayos ang kalusugan ng mga estudyante.

Nakasaad sa panukala, na inaatasan nito ang Department of Education (Deped) na mag-hire ng isang registered nurse sa bawat public school sa bansa.

Bukod umano sa makakatulong ito para mabigyang trabaho ang maraming registered nurse sa bansa ay tutugon din ito sa pagpapabuti ng health care service sa mga public school students.

Ang makukuhang nurse para sa public schools ay tatanggap ng buwang sweldo na nasa salary grade 15.