Militarisasyon ng China sa West Philippine Sea ikinabahala

MANILA, Philippines – Ikinabahala ng Armed Forces of the Philippines (AFP) ang patuloy na militarisasyon ng China sa pinag-aagawang teritoryo sa South China Sea (West Philippine Sea).

Una nang pinalagan ng Pilipinas at kinondena ng mga bansang kaalyado nito kabilang ang Estados Unidos ang deployment ng China ng surface-to-air-missile sa West Philippine Sea.

Nangangamba ang mga kinauukulan na targetin ng surface-to-air-missile ng China ang mga dayuhang aircraft na lilipad sa himpapawid alinsunod sa Air Defense Zone  na nais ipatupad ng nasabing bansa sa natu­rang teritoryo na balakid sa ‘freedom of international navigation’.

Sa kasalukuyan, ayon kay AFP-Western Command Vice Admiral Alex­ander Lopez, patuloy na magiging vigilante at alerto ang tropa ng Pilipinas na nagbabantay sa mga islang inaangkin ng Pilipinas sa WPS.

Bukod sa Pilipinas kabilang pa sa mga bansang nag-aagawan sa Spratly Islands ay ang Vietnam, Malaysia, Brunei, Taiwan at China na pinakamapangahas.

“It’s not actually expecting itong nangyayari, but more of, that’s how we plan eh, we plan for the worst. That’s how the military plans, so we take into consideration the worst case scenario, so the planning namin is based on that,” sabi ni Lopez.