Microsoft-ի «ամպային» և բջջային տեխնոլոգիաների տարածաշրջանային կենտրոն կբացվի Հայաստանում

ԵՐԵՎԱՆ, 21 մայիսի. /ԱՌԿԱ/. Microsoft-ի «ամպային» և բջջային տեխնոլոգիաների տարածաշրջանային կենտրոն կբացվի Հայաստանում, ասաց Հայաստանի էկոնոմիկայի նախարար Կարեն Ճշմարիտյանը կառավարության նիստում։

Հայաստանի կառավարությունը հինգշաբթի օրվա նիստում հավանություն է տվել «Մայքրոսոֆթ» ընկերության հետ Համագործակցության հուշագրի, Լիցենզավորման պայմանագրերի և Կառավարության անվտանգության ծրագրի պայմանագրի կնքման առաջարկությանը: Որոշման համար հիմք է հանդիսացել 2014թ. սեպտեմբերի 26-ին Նյու Յորքում կայացած 7-րդ ամենամյա «Արմթեք 2014» Հայաստանի բարձր տեխնոլոգիաների ոլորտի գլոբալ համաժողովի շրջանակում ՀՀ էկոնոմիկայի նախարարության և «Մայքրոսոֆթ» ընկերության միջև ստորագրված փոխըմբռնման հուշագիրը:

Ինչպես նշեց նախարարը, հաջորդ շաբաթ Հայաստան կժամանի Microsoft–ի ներկայացուցիչների պատվիրակությունը, որոնց հետ երեք համաձայնագիր կստորագրվի։

«Համաձայնագրերով նախատեսվում է Հայաստանում Microsoft-ի «ամպային» և բջջային տեխնոլոգիաների տարածաշրջանային կենտրոնի ստեղծում Microsoft նորարարական կենտրոնի հիման վրա, համագործակցություն կրթական ոլորտներում, մտավոր սեփականության պաշտպանության համատեղ ծրագրերի և այլ ծրագրերի իրագործում»,– ասաց Ճշմարիտյանը։

Ինչպես նշեց նախարարը, համաձայնագրերով նախատեսված են նաև Հայաստանի կառավարության որոշակի պարտավորություններ, որոնք թույլ կտան լիարժեք իրագործել համաձայնագրերով ծրագրված բոլոր միջոցառումները։

Նախատեսվում է, որ կառավարությունը եռամյա ծրագրի շրջանակում ամեն տարի ծրագրի իրագործմանը կուղղի 1.18 մլն դոլար, սակայն վարչապետն առաջարկեց վերանայել նախատեսված գումարը։

Microsoft կորպորացիան համագործակցում է Հայաստանի հետ 2007 թ.-ի հունվարի 30-ին Շոտլանդիայի Էդինբուրգ քաղաքում ստորագրված համաձայնագրի համաձայն: Microsoft-ը Հայաստանում իրականացնում է մի շարք ներդրումային, կրթական և նորարարական ծրագրեր, որոնց թվում էր նաև Հայաստանում Microsoft ինովացիոն կենտրոնի բացումը: –0--

Ծանոթացեք լուրերին առաջինն ու քննարկեք դրանք մեր Telegram-ում

21:01 21.05.2015