Հայաստանը կարող է կամուրջ դառնալ Արևմուտքի և ԵՏՄ–ի ՏՏ շուկաների միջև. UITE

ԵՐԵՎԱՆ, 23 հունվարի. /ԱՌԿԱ/. Հայաստանն ունի բոլոր հնարավորությունները յուրօրինակ կամուրջ դառնալու Արևմուտքի և ԵՏՄ–ի ՏՏ շուկաների միջև, ուրբաթ լրագրողներին ասաց Ինֆորմացիոն տեխնոլոգիաների ձեռնարկությունների միության գործադիր տնօրենի տեղակալ Հայկ Չոբանյանը։

«Մենք կարող ենք հետաքրքիր տեղ ունենալ ԵՏՄ ՏՏ շուկայում` յուրօրինակ կամուրջ դառնալով Մաքսային միության երկրների և Արևմուտքի միջև, որի հետ Ռուսաստանն այսօր որոշակի խնդիրներ ունի»,– ասաց Չոբանյանը, ով ուրբաթ մասնակցում էր «Եվրասիական միության հնարավորությունները և խնդիրները» թեմայով քննարկմանը։

Ըստ նրա` Հայաստանի ՏՏ ոլորտում ներդրումների 45 տոկոսը բաժին է ընկնում ԱՄՆ–ին և միայն 24 տոկոսը ստացվում է ԱՊՀ–ից։

«Ամերիկյան ներկայությունը Հայաստանի ՏՏ ոլորտում մեծ է և զգալի, և կարող ենք կամուրջ դառնալ ԱՄՆ–ի և Ռուսաստանի միջև»,– ավելացրեց նա։

Նա միաժամանակ ընդգծեց, որ վերջին ժամանակներում որոշակի հետաքրքրություն է նկատվում Հայաստանի ՏՏ ոլորտի նկատմամբ ռուսական բիզնես–շրջանակներում։

«Մենք Ռուսաստանից որոշ ներդրումներ ենք սպասում ԵՏՄ–ին Հայաստանի միացման համատեքստում, բայց կան նաև ռիսկեր, որ այդ ներդրումների մի մասը կուղղվի մի քանի հայկական ընկերություններ Ռուսաստան տեղափոխելուն»,– ընդգծեց նա։

Չոբանյանը միաժամանակ ընդգծեց, որ երրորդ երկրների հետ համագործակցության զարգացման համար ռիսկեր չի տեսնում, քանի որ ԵՏՄ–ի կազմից դուրս գտնվող երկրների հետ մաքսային ընթացակարգերը մնում են անփոփոխ։

Հայաստանի էկոնոմիկայի նախարարության տվյալներով` Հայաստանի տեղեկատվական տեխնոլոգիաների ոլորտի ընդհանուր հասույթը 2014 թվականի արդյունքներով կաճի 25.2 տոկոսով` կազմելով 474.9 մլն դոլար։

2000 թվականին Հայաստանի կառավարությունը ՏՏ ոլորտը հայտարարել է երկրի տնտեսության գերակա ոլորտ։ 2014 թվականի հունվարի 1–ի տվյալներով, Հայաստանում գրանցված են ՏՏ ոլորտի ավելի քան 380 ընկերություններ, որոնցից 159–ը` արտասահմանյան կապիտալով կամ արտասահմանյան խոշոր ընկերությունների ներկայացուցչություններ։  

Ամեն տարի Հայաստանի տեղեկատվական տեխնոլոգիաների ոլորտն ապահովում է շուրջ 20-25–տոկոսանոց աճ։ ՏՏ ոլորտի բաժնեմասը Հայաստանի ՀՆԱ–ում կազմում է 380 մլն դոլար։ Բնագավառի զարգացման ռազմավարության համաձայն, 2018 թվականին ծրագրվում է ապահովել ՏՏ–ոլորտի 1 մլրդ դոլարի շրջանառություն։

ԵՏՄ–ի ստեղծման մասին պայմանագիրը Ռուսաստանը, Բելառուսը և Ղազախստանը ստորագրել են մայիսի 29–ին Աստանայում, փաստաթուղթն ուժի մեջ է մտել 2015 թվականի հունվարի 1–ից։ Հայաստանը պայմանագիրը ստորագրել է 2014 թվականի հոկտեմբերի 10–ին։ ԵՏՄ–ին Հայաստանի միացման մասին պայմանագիրը վավերացրել են Ռուսաստանի, Բելառուսի և Ղազախստանի խորհրդարանները։ Հայաստանը Եվրասիական տնտեսական միության լիիրավ անդամ է դարձել 2015 թվականի հունվարի 2–ից։ -0-

Ծանոթացեք լուրերին առաջինն ու քննարկեք դրանք մեր Telegram-ում

17:48 23.01.2015