Yahoo!–ն առաջին եռամսյակում 15 անգամ կրճատել է շահույթը

ԵՐԵՎԱՆ, 22 ապրիլի. /ԱՌԿԱ/. Yahoo! Inc ինտերնետային ընկերությունը, որը ԱՄՆ–ում ամենահայտնի ինտերնետային պորտալներից մեկի սեփականատերն է, 2015թ.–ի առաջին եռամսյակում մոտ 15 անգամ կրճատել է զուտ շահույթը, հայտնում է Ինտերֆաքսը։

Ինչպես նշվում է ընկերության մամուլի հաղորդագրության մեջ, Yahoo! Inc–ի զուտ շահույթը հունվար–մարտին կազմել է 21,2 մլն դոլար կամ 2 ցենտ մեկ բաժնետոմսի հաշվով` նախորդ տարվա հույն ժամանակահատվածում ստացված 311,6 մլն դոլարի կամ բաժնետոմսի դիմաց ստացված 29 ցենտի դիմաց։

Հասույթի ընդհանուր ծավալն ավելացել է 8,2 տոկոսով` 1,133 մլրդ դոլարից դառնալով 1,226 մլրդ դոլար։ Միաժամանակ հասույթը, չհաշված ինտերնետային տրաֆիկի ձեռքբերման ծախսերը, նվազել է` մեկ տարի առաջ գրանցված 1,09 մլրդ դոլարից դառնալով 1,04 մլրդ դոլար։

Thomson Reuters–ի հարցմանը մասնակցած վերլուծաբանները կանխատեսել են բաժնետոմսի դիմաց 18 ցենտի շահույթ` 1,06 մլրդ դոլարի հասույթի դեպքում` առանց տրաֆիկի ձեռքբերման ծախսերի։

Ընկերությունը երկրորդ եռամսյակում նախատեսում է ստանալ 1,21–1,25 մլրդ դոլարի հասույթ, իսկ չհաշված տրաֆիկի ծախսերը` 1,01-1,05 մլրդ դոլար, նշվում է հաղորդագրության մեջ։

Yahoo!–ի բաժնետոմսերի գինը երեքշաբթի կայացած էլեկտրոնային առուվաճառքի ընթացքում ավելացել է 0,7 տոկոսով։ Ընկերության կապիտալիզացումը ընթացիկ տարվա սկզբից նվազել է 12 տոկոսով 2014 թ.–ի արդյունքում գրանցված 22 տոկոսանոց աճից հետո։–0–

Ծանոթացեք լուրերին առաջինն ու քննարկեք դրանք մեր Telegram-ում

15:17 22.04.2015