Չինաստանում փակել են կեղծ iPhone–ներ արտադրող գործարանը

ԵՐԵՎԱՆ, հուլիսի 28. /ԱՌԿԱ/. Չինաստանում հուլիսի 28–ին փակել են կեղծ iPhone–ներ արտադրող գործարանը։ Նախնական տվյալով` ընդհատակյա արտադրությունում հավաքվել է ավելի քան 40 հազար կեղծ սմարթֆոն։ Ձերբակալվել է 9 մարդ, առգրավվել ավելի քան 1400 հեռախոս, որոնք պատրաստ էին վաճառքի, գրում է Vestifinance.ru–ն։

Նոր iPhone–ները հավաքել են օգտագործված կամ կեղծ դետալներից։ Նման սմարթֆոնները միայն արտահանվել են, այդ թվում` ԱՄՆ։ 2015թ.–ի հունվարին բացումից ի վեր գործարանում հավաքվել և վաճառվել է 41 հազար սարք` 12 մլն յուանով (19,4 մլն դոլար)։Արտադրությունում աշխատել են հարյուրավոր աշխատողներ, որոնք աշխատել են Պեկինի հյուսիսային արվարձաններից մեկում։ Գործարանում աշխատել է վեց գիծ։ Անորակ հեռախոսներին առաջինն ուշադրություն են դարձրել ամերիկյան իշխանությունները, որոնք առգրավել են մի քանի կեղծ սմարթֆոն։

Գործարանը հայտնաբերվել է դեռ մայիսի 14–ին ծառայությունների կենտրոններից մեկում, սակայն հասարակական անվտանգության բյուրոն սոցիալական ցանցերում հաղորդել է գործողության մասին միայն հիմա։ Ընդհատակյա արտադրությունն ամուսնական զույգ է ղեկավարել։

Չինաստանի իշխանությունն ակտիվ պայքարում է անօրինական արտադրության դեմ և նույնիսկ պաշտոնական պատերազմ հայտարարել։ Ընկերությունները ստիպում են պաշտոնական պայմանագրեր կնքել խոշոր ապրանքանիշների հետ։

Սա առաջին դեպքը չէ, երբ Չինաստանում iPhone–ի ընդհատակյա արտադրություն են գտնում։ Չորս տարի առաջ Կունմին քաղաքում արդեն փակվել էր նման մի գործարան։ Պահեստի շատ աշխատողներ ձերբակալության ժամանակ համոզված են եղել, որ աշխատում են Apple ընկերությունում, քանի որ կեղծ սարքերն իրականում անչափ նման են եղել իսկական հեռախոսներին։

Ապրանքները կեղծելու խնդիրը մինչ օրս արդիական է։ Այն իր գագաթնակետին է  հասել 2012թ.–ին, երբ կեղծ ապրանքների ընդհանուր արժեքը գերազանցել է 1,7 տրլն դոլարը։-0-

Ծանոթացեք լուրերին առաջինն ու քննարկեք դրանք մեր Telegram-ում

17:41 28.07.2015