Թվային հեռարձակմանն անցնելու պայմանների փոփոխության մասին օրինագիծը ՀՀ ԱԺ–ի քննարկման է ներկայացվել. փորձագետ
ԵՐԵՎԱՆ, 16 դեկտեմբերի. /ԱՌԿԱ/. Մի շարք կազմակերպություններ խորհրդարանի քննարկմանն են ներկայացրել թվային հեռարձակմանն անցնելու պայմանների փոփոխության մասին օրինագիծը, երեքշաբթի «Թվային հեռարձակմանն անցնելու մարտահրավերները Հայաստանում» թեմայով կազմակերպված հանրային քննարկման և աշխատանքային հանդիպման ժամանակ տեղեկացրեց Խոսքի ազատության պաշտպանության կոմիտեի նախագահ Աշոտ Մելիքյանը։
Հայաստանը թվային հեռարձակման կանցնի 2015 թվականի հունիսի 1–ին։ Որոշման համաձայն` մինչև այդ պահը Հայաստանում պետք է ավարտվի թվային հեռարձակման վերգետնյա համակարգի ներդրման գործընթացը, և 2015 թվականի հունիսի 1–ից սկսվի թվային հեռարձակման եվրոպական ընդհանուր չափանիշի անցնելը։ «Հեռուստատեսության և ռադիոյի մասին» օրենքի` 2010 թվականին ընդունած լրացումներին համապատասխան, տասնութ հեռուստաալիքների թվային հեռարձակմանն անցնելը նախատեսվում էր իրականացնել մինչև 2015 թվականի հուլիսի 20–ը։
Ինչպես նշեց Մելիքյանը, անցնման գործընթացը, ըստ օրենքի, կիրականացվի պետության դոտացիաներով, և թվային հեռարձակման կանցնեն արդեն գոյություն ունեցող հեռուստաընկերությունները, միաժամանակ մասնավոր մուլտիպլեքսների շուկա դուրս գալու հնարավորության մասին օրենքում գրեթե չի խոսվում։
«Բազմաթիվ օրենսդրական փոփոխությունների անհրաժեշտություն կա, մասնավորապես` անհրաժեշտ է ճշտել մասնավոր մուլտիպլեքսների շուկա դուրս գալու հնարավորությունը, քանի որ օրենքով նախատեսվում է չորս մուլտիպլեքսների առկայություն այն հեռուստաընկերությունների համար, որոնք արդեն գործում են, սակայն ոչինչ չի ասվում այն մասին, թե ինչպես են շուկա դուրս գալու մասնավոր ներկայացուցիչները», – նշեց Մելիքյանը։
Նրա խոսքով` օրինագծի մշակողները Ազգային ժողովի պրոֆիլային կոմիտե են ներկայացրել իրենց առաջարկները, որոնք թույլ կտան, մասնավորապես, տարածաշրջանային հեռուստաընկերություններին օգտվել մասնավոր մուլտիպլեքսներից, որոնց հնարավորություն կընձեռվի շուկա դուրս գալ արդեն գոյություն ունեցող մուլտիպլեքսների հետ հավասար, որոնք ապահովված են պետության կողմից։
«Այս առաջարկները կարող են արմատապես փոխել դրությունը, քանի որ տարածաշրջանային ալիքները կարող են փակվել գործող օրենսդրության շրջանակում։ Խոսքը արտոնագրման պարզ համակարգին անցում կատարելու մասին է։ Այսինքն` հեռուստաընկերությունները կկարողանան ինքնուրույն որոշել, թե ինչպես են հեռարձակվելու` պետական, արբանյակային, թե մալուխային մուլտիպլեքսների օգնությամբ», – ասաց Մելիքյանը։
Նրա խոսքով` հարկավոր է նաև պարզել, թե որքան անապահով ընտանիքների համար է հարկավոր ձեռք բերել ապակոդավորող սարքեր։ Այսօր հստակ տվյալներ չկան, և թվերը տատանվում են 130–150 հազար ընտանիքի սահմանում։ (Կառավարության որոշմամբ` նախատեսված է հատկացնել 2,5 մլն դոլար անապահով ընտանիքների համար 100 հազար ապակոդավորող սարք գնելու համար)։
«Բաց հասարակություն հիմնադրամներ – Հայաստան»–ի գործադիր տնօրեն Լարիսա Մինասյանի խոսքերով` հարկավոր է քաղաքացիական հասարակության հետ քննարկել թվային հեռուստատեսությանն անցնելու գործընթացն ու գոյություն ունեցող խնդիրները։
«Հիմնական խնդիրն այն է, որ թվային հեռարձակմանն անցնելու գործընթացը չնպաստի հեռարձակողների թվի ավելացմանը, նոր մոտեցումների առաջացմանը, այլ հակառակը` նվազեցնի դրանց թիվը, ինչը գործընթացի հակառակ նպատակն է։ Պատճառները մի քանիսն են, սակայն հիմնական պատճառն այն է, որ արդեն վաղուց նպատակ է դրվում ոլորտը հստակ և համալիր վերահսկողության տակ առնել», – ասաց Մինասյանը «ԱՌԿԱ» գործակալության թղթակցին։
Նրա խոսքով` եթե պետական դոտացիաների օգնությամբ անհնար է ապահովել բոլոր ալիքների հեռարձակումը, ապա հարկավոր է դաշտ բացել կոմերցիոն գործունեության համար և թույլ տալ հավասար պայմաններով գոյություն ունենալ նաև մասնավոր մուլտիպլեքսներին։–0–
Ծանոթացեք լուրերին առաջինն ու քննարկեք դրանք մեր Telegram-ում
18:53 16.12.2014