Երևանում ամփոփվել են «ՏՏ–ն իմ կյանքում» դպրոցական էսսեների մրցույթի արդյունքները
ԵՐԵՎԱՆ, 20 մայիսի. /ԱՌԿԱ/. Չորեքշաբթի Երևանում ամփոփվել են «ԱրմենՏել» ՓԲԸ–ի և «Եվրասիա» միջազգային համալսարանի քոլեջի կազմակերպած «Տեղեկատվական տեխնոլոգիաներն իմ կյանքում» ստեղծագործական էսսեների միջդպրոցական մրցույթի արդյունքները։
Մրցույթում ներկայացվել է ավելի քան 100 աշխատանք` դպրոցականների կյանքում տեղեկատվական տեխնոլոգիաների դերի մասին։
Մրցույթի երեք հաղթողներին` Նանա Գալստյանին, Աիդա Կարապետյանին և Սոնա Հովհաննիսյանին Beeline Smart սմարթֆոններ են հանձնել։ Խրախուսական մրցանակի է արժանացել Լիդա Քոչարյանը, որի աշխատանքն առավելագույն թվով «like»-եր է հավաքել Facebook սոցիալական ցանցի` «Եվրասիա» միջազգային համալսարանի քոլեջի էջում։
«Ամփոփելով մրցույթի արդյունքները` կարելի է ասել, որ հայկական դպրոցներում այսօր տաղանդավոր երիտասարդներ են սովորում, որոնք ոչ միայն հստակ գիտակցում են տեղեկատվական տեխնոլոգիաների արդյունավետ օգտագործման կարևորությունը, այլ նաև պատրաստ են դրանք կիրառել կյանքն ավելի լավը դարձնելու համար»,– ասաց ընկերության գլխավոր տնօրեն Անդրեյ Պյատախինը։
Ըստ նրա, Beeline–ի աջակցությամբ անցկացված մրցույթի շնորհիվ Երևանի և մարզերի դպրոցների աշակերտները ժամանակակից տեղեկատվական տեխնոլոգիաների մասին իրենց գաղափարները ներկայացնելու հնարավորություն են ստացել, որոնք նոր սկզբունքների և մոտեցումների հիմք կդառնան կրթության ոլորտում տեղեկատվական տեխնոլոգիաների օգտագործման համար։
Նա նշեց նաև, որ աշխատանքների որակը շատ բարձր էր, և հեղինակավոր հանձնաժողովի համար բարդ էր հաղթողին ընտրել։ «Ես իսկապես հավատում եմ, որ աշակերտների մեջ կան ապագա Մարկ Ցուկերբերգներ և Բիլ Գեյթսեր»,– ասաց Պյատախինը։
«Այսօր տեղեկատվական տեխնոլոգիաները հիմնովին մտել են մեր կյանքի բոլոր ոլորտներ, և կրթության ոլորտի առաջընթացը շատ հարցում կախված է դրանցից։ Այսօր դպրոցականներն ապրում են այնպիսի միջավայրում, որտեղ իրենց ժամանակն ավելի արդյունավետ են օգտագործում և տեղեկատվական տեխնոլոգիաների օգնությամբ կարող են տեղեկության մեծ ծավալը հիմնարար գիտելիքների վերածել»,– ասաց «Եվրասիա» միջազգային համալսարանի ռեկտոր Սուրեն Օհանյանը։
Նա նշեց նաև, որ երեխաները սիրում են օգտվել տեղեկատվական տեխնոլոգիաներից, և փորձը ցույց է տալիս, որ այդ երեխաներն ավելի բարձր արդյունքներ են ցույց տալիս։ Ըստ նրա, քանի որ տեղեկատվական տեխնոլոգիաներն այդքան էլ հավասարաչափ չեն տարածվում Հայաստանի տարածքում, ապա մրցույթի նպատակն էր պարզել, թե որքան են տարածված տեղեկատվական տեխնոլոգիաները կրթական հաստատություններում և որքանով են աշակերտներն իրազեկված և որքանով են օգտագործում այդ տեխնոլոգիաները։
«Հաշվի առնելով դպրոցների դրսևորած հետաքրքրությունը` մենք հույս ունենք մրցույթն ավանդական, ամենամյա դարձնել։ Ապագայում մենք հույս ունենք, որ մրցույթն ավելի լայն լսարան կընդգրկի»,– ավելացրեց Օհանյանը։
«Տեղեկատվական տեխնոլոգիաներն իմ կյանքում» մրցույթն անցկացվել է Հայաստանի ողջ տարածքի միջնակարգ և ավագ դպրոցների աշակերտների շրջանում հանրապետության կրթության նախարարության օժանդակությամբ։ -0-
Ծանոթացեք լուրերին առաջինն ու քննարկեք դրանք մեր Telegram-ում
17:33 20.05.2015